Gaurkotasun Buletina Data: 08-06-2018
Jaietako argazki eta kartel lehiaketak martxan dira, baita egitarau ofizialerako ekarpenak egiteko epea ere Lanak eta proposamenak BAZen aurkeztu behar dira
Hondarribiko Jai Nagusiak egunez egun gertuago dira, bistan denez. Udala aspalditik ari da haiek prestatzeko lanetan, eta, prozesu horretan, hiru mugarri izango ditu datozen asteotan. Izan ere, ekainaren 29ra bitarte jaietako kartel eta argazki lehiaketetan parte hartzeko epea zabalik egongo da, eta herritarrek ekintzak proposatzeko aldia, berriz, 23ra arte. Lanak aurkeztu edota proposamenak egiteko tokia, ohi bezala, BAZ da.
Jai Nagusietako kartel lehiaketan edozeinek har dezake parte. Teknika librea da, lanek orijinalak behar dute, eta neurriek, aldiz, 70x50cm-koak, bertikalean. Irabazten duenak 650 euroko saria jasoko du, eta bere obra Jaiak iragartzeko kartel ofiziala izango da. Bigarren sailkatuak 300 euroko saria dauka zain, 200ekoa hirugarrenak.
Argazki lehiaketan parte hartzea ere irekia da. Hondarribia kokaleku duten zuri-beltzeko edo koloretako argazkiak onartuko ditu Udalak. Parte-hartzaile bakoitzak aurrez argitaratu edo saritu gabeko lau ale aurkez ditzake, 20x30cm-ko neurrikoak, eta markorik gabekoak. 500, 400 eta 300 euroko sariak jasoko dituzte, hurrenez hurren, lehen hiru sailkatuek. Arma Plazako Infterpretazio Zentroan Jai Nagusiak hasi baino lehen egingo den erakusketan egongo dira ikusgai lan guztiok.
Bestalde, herritarrek ekintzak proposatzeko epea ekainaren 23ra arte dago zabalik. Eskaera-orriarekin batera eskatutako ekintzen behar tekniko eta ekonomikoak eranstea galdegin du Kultura Sailak. Horrez gain, Erantzukizun Zibileko Aseguru Poliza izenpetzea derrigorrezkoa da, ez direlako Udalak zuzenean antolatutako ekintzak. Informazio gehiagorako Kultura Sailaren bulegora joan (Panpinot kalea, 14, 2.solairua) edota 943 11 12 83 telefonora deitzeko aukera dago.
itzuli
Buletinan harpidetza egin
Publizitatu nahi duzu hemen?